ازاى بنتعامل مع الخزى؟

سؤال: ازاى بنتعامل مع الخزى؟
معنديش اجابة واضحة بس ممكن افكر
اعتقد اول حاجة انى اصلا اعرف ان عندى خزى....
ساعات كتير بيكون الخزى مدفون لدرجة انى مش شايفه...
تانى حاجة، اعتقد انى محتاج اعرف جدور الخزى دا جاية منين ...

الخزى بيقول ان فيا حاجة غلط طيب ايه بالظبط اللى غلط؟
تالت حاجة، انى اعرف جدور الموضوع من ناحية احتياجى.... زى ماكنتى بتتكلمى عن احتياجك للامان..... اعتقد انى وصولى للاحتياجات الاساسية اللى طلعت "فعل او موقف معين" بيخلينى افهم اكتر انى مش حد وحش...
لو انا عملت فعل معين مش صح (زى ان احتياجى دفعنى انى ادخل فى علاقة مش صح تماما....فكأنى كنت جعان واكلت من الزبالة) انا مصحتش الصبح قررت انى اكل من الزبالة ...لا انا اكلت عشان جعان مش عشان دا كيفى.....فالفكره بتكون انى مش شخص سىء فى حد ذاته، بس عملت حاجة مش اصح حاجة بدافع من الجوع...
ودا اعتقد بيبدأ شوية قبول للنفس وطبطبة عليها ، يعنى نفسى كانت جعانه ومن كتر جوعها اكلت زبالة.... مش هبقى انا والزمن عليها
رابع حاجة، اعتقد انى اشارك حد بيفرق قوى....طبعا بنتكلم على حد آمن محسش معاه حتى ولو بلسعة ادانة...لأن فى المواقف اللى زى دى انا بكون عريان اوى فاى تيار هوا حتى لو صغير بيلسعنى وبيحسسنى بالادانة....
فاعتقد انى لما بشارك حد وبشوف انه شايفنى وانه مش شايف انى بنى آدم وحش ولا حاجة لا انا طبيعى يعنى.... بتطمن اكتر لنفسى وكأنى لما بتحضن من شخص آمن انا كمان بحضن نفسى...
اعتقد كمان انها مش مره مشاركة وخلاص....اعتقد انى محتاج اطلع المشاركة دى اكتر من مره (حتى لو عشرين او ميت مره)...بس بصدق انى كل مابطلعها كل ما سيطرة الخزى بتقل من عليا وكل مابشوف الدنيا بشكل اوضح.... كل مابشارك كل مابستقبل الحضن بتاع الشخص اللى قدامى فى حته اعمق من الخزى اللى جوايا.....

اخيرا التعامل مع الخزى صعب قوى، وبياخد وقت ومعافرة كتير جوايا عشان اعرف اوصل لجدور الخزى دا واعرف اديها قبول

اضافة من تعليق:
لو ينفع ازود ..مثال العلاقات مش بيبقي السبب الوحيد ليه انى جعان.. الخزى بيخلينى مش شايفة انى استاهل حاجة كويسة ونضيفة فباخد المؤذى حتى وانا عارفة انه ده لأن بيبقي الخزى خلاص شوه صورتى الحقيقية وسيطر عليا.