"- رفيق،
يعنى ايه انسان مريح؟
=مممم مش عارف...
يمكن الانسان بيكون مريح لما بيتصالح مع ضعفه ومحدوديته...
لما مش بيبقى بيحاول يثبت حاجة دايما.. ولما مش بيكون متمسك بصورة معينه يقدمها للى قدامه...
يمكن بيكون مريح لما مش بيمتلك الحق وبيكون عايز يتعلم من اللى قدامه ويعرفه بجد....
سايب نفسه يتغير باللى قصاده ....
يمكن الانسان بيبقى مريح لما بيكون مرتاح مع نفسه ومع كيانه ، فكأنه بيدعو آخرين للراحة اللى جوايه يرتاحوا معاه فيها"
- وازاى الانسان يرتاح مع نفسه ويتصالح مع كيانه؟
= مممم... اعتقد ان الانسان بيرتاح مع نفسه لما بيتصالح مع لخبطتة....
مع تناقضاته...
مع ان جواه الخير والشر مع بعض...
مع مشاعره اللى ممكن اوقات تكون عكس بعض...
مع دوافعه اللى ممكن تكون بتزقه فى اتجاهات مختلفه....
لما يتصالح مع جوعه...لما يتصالح مع احتياجاته وميستعرش منها...
.لما يتصالح مع جروحه ويقبل وجعه ويقبل سكته الطويلة للشفا....
لما يتصالح مع عدم كماله ويقبل انه مش انسان كامل ويقبل يشوف نفسه كده...
لما يتصالح مع انسانيته ويقبل انه انسان....مش اكتر ومش اقل....
No comments:
Post a Comment