امبارح كنت بحضر ايفنت اونلاين لعملاق الطب النفسى ايرفين يالوم. كان بيتكلم فيه عن كتابه الاخير A matter of life and deaths . الكتاب كاتبه هو ومراته عن رحلتهم مع مرضها بالكانسر اللى ملوش علاج. ازاى هى بتحاول تتقبل انها هتموت بعد فتره قصيرة وازاى هو بيحاول انه يتقبل شكل الحياة من غيرها. كل واحد فيهم كان بيكتب عن صراعه، وهى اتوفت فى نص الكتاب وهو اضطر يكمل بقيت الكتاب من غيرها.
كان بيقول ان رغم ان عنده خبره كتير فى علاج الناس اللى بتمر بظروف مشابهة (سواء عندهم مرض خطير، او بيتعاملو مع فقد انسان قريب منهم) ، الا ان الخبرة بتاعت موت مراته هزت كيانه بشده لدرجة انه احتاج يروح هو نفسه يطلب علاج نفسى عشان يعرف يتعامل مع خبرة الفقد. (مراته كانت حب حياته، اتقابلوا وهما عندهم 14 سنة وعاشوا مع بعض لغاية لما بقى عنده 90 سنة ).
اتكلم عن مراحل الحزن من انكار وهروب لادمانات ، اتكلم حتى ان جزء كبير من هروبه كان فى تفكير جنسى كتير وانه اكتشف ان دا شائع جدا فى التعامل مع الموت لان الجنس بيوفر مهرب كبير من فكره الموت المسيطرة على البنى آدم.
فى الآخر اتكلم عن خبرته مع المعالجة النفسية بتاعته وانه لما كان بيتكلم على خبرة الفقد وانه مش عارف ازاى هيتعافى منها ، من انه مفقتد حب حياته جنبه فى كل وقت، مفتقد انه يشاركها الصور اللى بيتصورها والحكايات اللى بيحكيها.... وانه ازاى حاسس ان اختباره اصلا للواقع من حواليه بقى مختلف عن الأول لأن مفيش حد يشاركه معاه زيها. المعالجة قالتله حاجة مهمة وهى :
"عندما يتوفى شخص عزيز عليك..
هذا شئ لا يمكنك الشفاء منه...
انه يكون مثل بتر لأحد أطرافك...
يمكنك فقط أن تتأقلم على الحياة بدونه...
أن تتعايش مع ألم فقدانه كل يوم"
No comments:
Post a Comment