ماهو مفهوم الرجولة؟ من هو الرجل؟
ايه الحاجات اللى لو عملتها ( او معملتهاش) تبقى راجل؟
لما بنقول "خليك راجل" ايه المعانى اللى بنوصلها بالجملة دى؟
طبعا كل واحد وواحده عندهم اجابة خاصة على السؤال ده...
ايه الحاجات اللى لو عملتها ( او معملتهاش) تبقى راجل؟
لما بنقول "خليك راجل" ايه المعانى اللى بنوصلها بالجملة دى؟
طبعا كل واحد وواحده عندهم اجابة خاصة على السؤال ده...
كل ولد اتربى على الحاجات اللى لما يعملها يعرف يشوف نفسه راجل
وكل بنت اتربت على الحاجات اللى تتوقعها من الراجل
وبالتالى المجتمع زى مايكون اتفق ورسم صورة لشكل الراجل ...
وطبعا عشان المجتمع مفاهيمه مشوهة عن حاجات كتير ، الصورة دى طلعت مشوهة وملخبطة ويمكن ساعات فيها حاجات متضاربة
هى فى الحقيقة مش صورة قوى... هى اقرب مايكون الى المسخ
خلينا نسمى المسخ دا "الراجل المزيف" .... وهنسميه كدا عشان هو معظم المفاهيم بتاعته بتبتقى عن كل ماهو ظاهرى وسطحى...
وطبعا المفهوم المقابل ليه هيبقى "الرااجل الحقيقى"
اولا: مفهوم القوة
الراجل المزيف كل مفهومة عن القوة هو يا انها اولا الجسدية
دايما بيحاول يثبت انه قوى ، او انه اقوى من حد معين... وبيستغل اى فرصة عشان يبين قوته دى ( من اول انه يشرب سجاير او يدخل دايما فى خناقات، او مثلا انه دايما يبقى مصاحب بنات حلوة....او انه يعمل او يدخل فى تحديات خطرة زى انه يسوق يتهور وبسرعة عاليه )
مفهومه عن القوة برضه هو فى السيطرة....
الطرف المسيطر هو الطرف القوى...
الطرف اللى كلامه بيمشى هو الطرف القوى...
عشان كده مثلا الراجل المزيف دا مش هاتلاقى عنده اى مجال للنقاش...
كلمته واجبة النفاذ ولازم تمشى....
كمان هو لا يحتمل ان يكون على خطأ ....
هو دايما صح ودايما عارف كل حاجة ومينفعش يقول معرفش...
ودايما بيدافع عن رأيه ومش بيراجع نفسه فى اى كلمه قالها او اى تصرف عمله
الراجل المزيف مش بيحب الضعف، مش بيحب يكون موجود مع ناس ضعيفه وطبعا مش بيحب انه يبان ضعيف فى اى وقت...
هو فى اعماقه بيخاف من الضعف... بيخاف المواقف اللى بيبقى فيها احتماليه كبيره انه ميعرفش يتصرف مثلا او يبان عاجز او قليل الحيلة.... وبيفضل اظهار قوته فى المناطق اللى هو متأكد من انها هيتفوق فيها وقوته هتبان
فمثلا بيفضل انه يظهر قوته فى الشغل لان دى ممكن تكون الحته بتاعته.... لكن فى البيت هو بيهرب من مواجهة اى مشاكل مع مراته او مع ولاده لان عادة الحته دى مفهاش وصفة او معادلة مضمونة للنجاح، دى بتطلب قدر كبير من التعليم والتجربة وقبول عدم الكمال وعدم المعرفه
فبالتالى ... احنا محاطين برجالة مدمنين للشغل، وللدراسة ، وللجيم مثلا مع الهروب من كل تحدى تانى فى الحياة...
( طبعا مش بنقول ان الشغل او الدراسة او الجيم غلط... لكن ادمانهم هو اللى غلط فى سبيل انك تهرب من مواجهات تانية)
اما الراجل الحقيقى، فهو اولا مش دايما عنده الاحتياج الملح انه يثبت انه قوى...
دا لانه واثق من قوته ومطمن ليها.....
الراجل الحقيقى مش دايما حاسس بتهديد ومش دايما عايز يثبت انه راجل .....
وطبعا مفهومه عن القوة مش جسدى، انما مفهوم مبنى على قد ايه هو عارف يحتوى اللى قدامه، قد ايه هو عارف يتعامل مع ازماته الداخلية بل وازمات المحيطين بيه كمان...قد ايه هو عارف يسند القريبين ليه....
عشان كده معندوش مشكله انه يدخل فى مواجهات ،
معندوش مشكلة انه يعتذر...
انه يعترف بخطأ عمله..
معندوش مشكلة انه يدخل فى نقاشات ويطلع منها مقتنع بحاجات ومش مقتنع بحاجات....
معندوش مشكلة انه يدى للطرف الآخر حرية التصرف ورد الفعل ، هو مش عايز يسيطر على حد وبالذات لو حد بيحبه ..
ممكن يكون بيحب المغامرة ، وبيحب يحلم ويحقق حلمه.... لكن طبعا هو بيحسب سلامته وسلامة الناس اللى حواليه وهو بيعمل دا....
دا لانه مسئول عن نفسه وعنهم..... هو مش منحصر فى نفسه ورغباته بس، لكن هو واعى باحتياجات الطرف الآخر وسلامته...
الراجل الحقيقى معندوش مشكلة مع الضعف....
معندوش مشكله انه يبان ضعيف ،
وطبعا معندوش مشكلة مع الضعفاء اللى حواليه.... بالعكس دا بيلاقى نفسه فى انه يحتويهم ويساعدهم واوقات بيدافع عنهم..
معندوش مشكلة انه يعرض نفسه لمواقف فيها احتماليه كبيره انه ميعرفش يتصرف فيها... دا لانه واثق انه هيتعلم منها حاجة وواثق فى كيانه مش مستنى حاجة تثبت رجولته دايما....
No comments:
Post a Comment