المشاعر
الراجل المزيف تقريبا المنطقة بتاعت المشاعر دى مطفية جواه.... هو مبيعرفش يتعامل مش مشاعره ، بالعكس هو بيعتبر اى تعبير عن المشاعر ( ماعدا مشاعر الغضب) هو نوع من الضعف والخنوع
وعشان هو مش بيعرف يتعامل مع مشاعره فدايما بتطلع فى شكل انفجارات....
وعادة ما بيشمل الانفجارات دى عنف ( لفظى او حتى جسدى) .....وعشان هو مش بيعرف يتعامل مع مشاعره فدايما بتطلع فى شكل انفجارات....
وده بيبان اكتر فى تعامله مع الجنس.... الراجل المزيف كل مفاهيمه تتمحور فى الحته دى حوالين العنف والسيطرة واظهار القوة... ولنا فى جروبات الفيس بوك والنصايح اللى عليها خير دليل....
وعشان الراجل المزيف مش واعى بنفسه فهو مش بيكون واعى او مراعى لمشاعرالناس اللى حواليه... وبالذات شريكته....
فهو كل اللى فارق معاه هو عايز ايه ومحتاج ايه وبس ( بالذات فى الجنس)
اما الراجل الحقيقى فهو عنده نوع من الذكاء الوجدانى... هو بيعرف اصلا يشوف مشاعره ، وبيعرف يعبر عنها ويتعامل معاها....
وفى الغضب بالذات هو بيكون عنده ذكاء فى تعمله مع مشاعره عشان متنفجرش وتعور حد تانى وفى نفس الوقت متبقاش مكبوته وتعوره هو شخصيا.....
اما فى الجنس فهو عنده مساحة لاختبار مساحات مختلفة من المشاعر... وعنده قدرة وطاقى لاحتواء الطرف الآخر ... وكمان قدرة على العطاء والخروج خارج الذات ...
----------------------- ------------------------ ------------------------
التعامل مع الحياة
الراجل المزيف عادة ما بيتبنى موقف سلبى تجاه
الحياة..... والسلبية دى بتظهر يا اما فى هروب يا اما فى عنف
زى مابنشوف رجالة كتير بتنسحب من معاركها ومش
بيواجهوا وبيفضلوا انهم يخلوا حد تانى يدخل المعارك الخاصة بيهم او يلفوا حوالين
المعارك دى بأى طريقة .... كمان بنشوف رجالة كتير بتستعمل العنف عند دخولة فى اى
تحدى او تعرضه لاى مشكله... سواء كان عنف جسدى او عنف لفظى ...
الراجل المزيف عشان معندوش اى ثقة فى كيانه
ودايما حاسس بالتهديد من اى راجل او ست قصاده فهو يا اما بيهرب او بيستخدم
العنف... عشان يا اما يمنع التهديد ده من انه يكمل، يا اما يأمن لنفسه مكسب
وانتصار سريع على حساب الطرف الآخر ( هو اهم حاجة عنده انه يكسب وانه يسيطر) ....
وده بيكون على حساب الطرف الآخر ( عادة بيجرح الطرف الآخر فى سبيل انه يأمن
انتصاره ده، هاتلاقيه بيهاجم الشخص اللى قدامه مش بينتقد الافكار او الموقف ، او
بيعاير الطرف الآخر بماضيه وبعيوبه اللى كشفها قدامه، او يفكره بأفضاله عليه)
اما بقى الراجل الحقيقي فهو بيتحدى نفسه انه
يلاقى التوازن بين انه يستخدم قوته ( الجسدية او النفسيه) وبين انه يستخدم
عقله (حكمته ومنطقه).... لكن دى حاجة مش سهلة خالص
لانه بيتطلب ان الراجل يكون دايما على دراية
ووعى بنفسه وباللخبطة والصراعات اللى بتحصل جواه لما يتحط فى موقف صعب.... وانه
يتحدى دفاعاته النفسية ورجولته المزيفة اللى عادة بتميل الى الهروب او العنف...
كنتيجة لده، بنشوفه بيسيب نفسه يدخل فى
مغامرات وتحديات .... وبيقدم على دخلو مناطق جديدة فى حياته لانه مش مرعوب من
الفشل...
فى الحقيقة الفشل بعبع لكل الرجالة.... دا
لأن عادة الرجال بيحط قيمته فى الانجاز والنجاح.... عشان كده لما بيخاطر يفشل
بيبقى بيخاطر بكل كيانه وكل قيمته....
وعشان كده الراجل الحقيقى بيعيد تعريف قيمته
كل شوية .... ويفكر نفسه علطول انه مفهاش مشكلة لو فشل ... وانه قيمته فى نفسه مش
فى الحاجات اللى بيعملها
--------------- --------------------- ------------------------
اخيرا، الرجولة الحقيقية هى رحلة ....
محتاجين نتعلمها ونعلمها
الرجولة الحقيقية بتدى امان ورعاية للمحيطين،
بينما الرجولة المزيفة بتدى خوف وتهديد ...
احنا جوانا الاتنين، جوانا الرجولة المزيفة
اللى ورثناها من المجتمع وجوانا الرجولة الحقيقية اللى كل واحد فينا بيحاول
يتعلمها.... مفيش راجل فينا مزيف كله ولا راجل فينا كامل فى حقيقيته كله.... وما
الحياة الا صراع بين الاتنين دول، وكل علاقة بندخلها وكل اختيار بنختاره يا اما
بيغذى ده يا اما ده...
سلاما لكل راجل حقيقى بيعافر وبيمشى خطوات
تجاه رجولته الحقيقية...
سلاما لكل انثى حقيقية صبرت على الراجل اللى
قصادها فى حروبه الداخلية وادته امان يكشف رجولته المزيفة ويلاقى الطريق جواه
لرجولة حقيقية...
شكرا لوجودكم فى وسط عالم ملىء بالمسخ
No comments:
Post a Comment